विश्‍वभर कोरोना संक्रमितको संख्या ५ करोड नाघ्यो


पछिल्ला २१ दिनमा मात्रै थपिए एक करोड संक्रमित
काठमाडौँ — विश्वव्यापी महामारीको रुप लिएको कोरोना भाइरसबाट संक्रमित हुनेको संख्या ५ करोड नाघेको छ । समाचार संस्था रोयटर्सका अनुसार पछिल्लो ३० दिनमा मात्रै कोरोना भाइरसको दोस्रो लहरका बीच एक चौथाई संक्रमित बढेका छन् । अक्टोबर महिना संक्रमणका हिसाबले सबैभन्दा खराब रह्यो । त्यस्तै पछिल्ला केही दिनमा अमेरिकामा दिनहुँ एक लाखभन्दा बढीमा कोरोना संक्रमण पुष्टि भएको छ । पछिल्ला दिनमा युरोपेली मुलुकमा पनि संक्रमण दर बढेकाले विश्वव्यापी रुपमा संक्रमितको संख्या बढिरहेको छ
पछिल्ला ७ दिनमा विश्वभर दैनिक रुपमा ५ लाख ४० हजारभन्दा बढी व्यक्तिमा कोरोना संक्रमण पुष्टि भइरहेको छ । संक्रमितको संख्या ३ करोडबाट ४ करोड पुग्न ३२ दिन लागेकोमा पछिल्लो समय २१ दिनमै थप एक करोडमा कोरोना पुष्टि भएको छ ।

जोन्स होप्किन्स विश्वविद्यालयको तथ्यांकअनुसार यो समाचार तयार पार्दासम्म विश्वभर कोरोना भाइरसबाट संक्रमित हुनेको संख्या ५ करोड ३ लाख ९५ हजार १ सय ७४ पुगेको छ । त्यस्तै कोरोनाबाट विश्वभर मृत्यु हुनेको संख्या १२ लाख ५५ हजार ४ सय ९० पुगेको छ भने करिब ३ करोड ३० लाख संक्रमणमुक्त भएका छन् ।

विश्वकै करिब २० प्रतिशत संक्रमित अमेरिकामा रहेका छन् । जोन्स होप्किन्स विश्वविद्यालयको कोरोना भाइरस रिसोर्स सेन्टरका अनुसार अमेरिकामा कोरोना संक्रमितको संख्या करिब एक करोड पुगेको छ । आइतबार बिहानसम्म अमेरिकामा कोरोना संक्रमितको संख्या ९९ लाख ६२ हजारभन्दा बढी पुगेको छ । अमेरिकामा कोरोनाबाट २ लाख ३७ हजारभन्दा बढीको मृत्यु भएको छ भने संक्रमण पुष्टि भएकामध्ये करिब ३९ लाख निको भएका छन् । अमेरिकामा पछिल्ला ७ दिनमा औसत एक लाखका दरले संक्रमितको संख्या बढिरहेको छ । शनिबार मात्रै अमेरिकामा एक लाख ३० हजारभन्दा बढीमा कोरोना संक्रमण देखिएको थियो ।

अक्टोबर चुनावी अभियानका क्रममा पनि अमेरिकामा कोरोना संक्रमण ह्वात्तै बढेको विज्ञहरुले बताएका छन् । स्वास्थ्य मापदण्ड नअपनाई चुनावी ऱ्याली आयोजना हुँदा कोरोना संक्रमण बढेको उनीहरुले बताएका छन् । राष्ट्रपति डोनाल्ड ट्रम्पको चुनावी ऱ्यालीमा अधिकांश व्यक्ति मास्कबिना सहभागी भएका थिए । ट्रम्पको तुलनामा राष्ट्रपतिमा निर्वाचित जो बाइडेनका चुनावी सभा भने व्यवस्थित भएको बताइन्छ । स्ट्यानफोर्ड विश्वविद्यालयका अनुसन्धाताहरुले गरेको अनुसन्धानमा ट्रम्पको ऱ्यालीमा सहभागीमध्ये ३० हजारमा कोरोना संक्रमण भएको र ७ सयभन्दा बढीको मृत्यु भएको उल्लेख गरिएको छ ।

रोयटर्सका अनुसार युरोपमा कोरोना भाइरसबाट संक्रमित हुनेको संख्या करिब एक करोड २० लाख रहेको छ । विश्वभर कोरोना भाइरसबाट मृत्यु हुनेमध्ये २४ प्रतिशत युरोपमा मात्रै भएको छ । रोयटर्सका अनुसार युरोपमा प्रत्येक तीन दिनमा करिब १० लाखमा कोरोना संक्रमण पुष्टि हुने गरेको छ । पछिल्लो समय फ्रान्समा संक्रमण ह्वात्तै बढेको छ । फ्रान्समा केही दिनयता दिनहुँ करिब ५४ हजारभन्दा बढीमा संक्रमण देखिएको छ ।

कोरोना संक्रमणका हिसाबमा भारत सबैभन्दा बढी प्रभावित भएको छ । सोमबार बिहानसम्म भारतमा कोरोना संक्रमितको संख्या ८५ लाख नाघेको छ । त्यस्तै भारतमा कोरोना संक्रमणबाट एक लाख २६ हजारभन्दा बढीको मृत्यु भएको छ भने संक्रमण पुष्टि भएकामध्ये ७८ लाखभन्दा बढी निको भएका छन् ।(कान्तिपुर )

जवाफ लेख्नुहोस्

Fill in your details below or click an icon to log in:

WordPress.com Logo

You are commenting using your WordPress.com account. Log Out /  बदल्नुहोस )

Google photo

You are commenting using your Google account. Log Out /  बदल्नुहोस )

Twitter picture

You are commenting using your Twitter account. Log Out /  बदल्नुहोस )

Facebook photo

You are commenting using your Facebook account. Log Out /  बदल्नुहोस )

This site uses Akismet to reduce spam. Learn how your comment data is processed.