मधेसी फकाउँदै प्रधानमन्त्री


रेवती सापकोटा
madhesi_morcha_and_3_party_leader_meeting_baluwatar_804829082_166286526काठमाडौं: तत्काल निर्वाचन गर्न असम्भव भएको अड्कलबाजी भइरहँदा प्रधानमन्त्री पुष्पकमल दाहाल स्थानीय तहको निर्वाचन मिति घोषणा गर्न संयुक्त लोकतान्त्रिक मधेसी मोर्चालाई फकाउने रणनीतिमा लागेका छन् ।
स्थानीय निर्वाचन नहुँदा संविधान कार्यान्वयनमा जटिलता आउने र प्राप्त उपलब्धि गुम्ने खतरा औंल्याउँदै प्रधानमन्त्री दाहालले मोर्चालाई फकाउने कसरत गरेका हुन् । मोर्चाका नेताहरूलाई प्रधानमन्त्री दाहालले छलफलका लागि सोमबार बालुवाटारमा बोलाएका छन् ।
अनौपचारिक कुराकानीका क्रममा मधेसी नेताहरूलाई संविधान संशोधन विधेयक अगाडि बढ्न नदिन एमालेको अडान, संशोधनका लागि आफूले गरेको प्रयास, संशोधनको पक्ष र विपक्षमा संसद्मा देखिने सांसदको संख्यालाई देखाएर दाहालले मधेसी मोर्चालाई सम्झाउन प्रयास गरिरहेका छन् ।
राष्ट्रपति, उपराष्ट्रपति र राष्ट्रिय सभाका सदस्यको निर्वाचनमा गाउँपालिकाका अध्यक्ष र उपाध्यक्ष तथा नगरपालिकाका मेयर र उपमेयरको मताधिकार कटौती गर्ने, संशोधन विधेयकलाई विधायन समितिमा छलफलमा लैजाने, सरकारले सम्बोधन गर्नसक्ने मधेसकेन्द्रित दलले उठाएका अन्य माग पूरा गर्ने प्रस्तावमा सहमति जुटाउने गरी गृहकार्य भइरहेको जानकारी प्रधानमन्त्री दाहालका राजनीतिक सल्लाहकार चक्रपाणि खनालले दिए ।
स्थानीय तह पुनर्संरचना आयोगको प्रतिवेदनमा मधेसी मोर्चाले स्वामित्व ग्रहण गरेको छैन । प्रतिवेदनलाई एमालेबाहेक कांग्रेस र माओवादी केन्द्रले पनि पूर्ण रूपमा स्वीकार गरेको देखिँदैन ।
संशोधनमा प्रमुख प्रतिपक्ष एमालेसहितका विपक्षी दलबाट सहयोग नपाएपछि दाहालले मोर्चाका नेतालाई नै फकाउने रणनीति बनाएका हुन् । मधेसकेन्द्रित दललाई बाहिर राखेर गरिने चुनावको औचित्य नहुने निष्कर्षमा रहेका दाहालले उनीहरूका माग सम्बोधन गर्ने विभिन्न विकल्पका बारेमा छलफल गरिरहेको खनालले बताए ।
‘मधेसी दललाई समेत सहभागी गराएर निर्वाचन मिति घोषणा हुन्छ’, खनालले अन्नपूर्णसँग भने, ‘त्यसका लागि गृहकार्य भइरहेको छ ।’ कांग्रेस, एमाले र माओवादी केन्द्रका नेताले आइतबार निर्वाचन मिति घोषणा हुने गरी छलफल अगाडि बढाएका थिए । तीन दलका नेताको समझदारीअनुसार निर्वाचन मिति घोषणा गरे आफूहरू आन्दोलनमा उत्रने चेतावनी मधेसी मोर्चाका नेताले दिएपछि दाहाल अप्ठ्यारोमा पर्दै आएका छन् ।
उनले आइतबारसम्म निर्वाचन मिति घोषणा हुने अभिव्यक्ति सार्वजनिक गरेका थिए । ‘त्यो मितिमा निर्वाचन मिति घोषणा हुन सकेन । यथाशीघ्र निर्वाचन मिति घोषणा गरिनुपर्छ । मुलुकसामु अर्को कुनै सकारात्मक विकल्प छैन’, माओवादी केन्द्रका नेता नारायणकाजी श्रेष्ठले भने ।
प्रधानमन्त्री दाहालले बालुवाटारमा आइतबार प्रमुख निर्वाचन आयुक्त अयोधीप्रसाद यादवलाई बोलाएर निर्वाचनको तयारी गर्न आग्रह गरेका छन् । ‘निर्वाचनको प्राविधिक तयारी गर्न सकिन्छ तर राजनीतिक सहमति जुटाउने चुनौती बाँकी छ’, खनालले भने । यसअघि बालुवाटारमै आइतबार नेपाली कांग्रेसका सभापति शेरबहादुर देउवासँग प्रधानमन्त्री दाहालले स्थानीय चुनावबारे छलफल गरेका थिए ।(अन्नपूर्ण पोस्ट )

Advertisements

जवाफ लेख्नुहोस्

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )