स्वास्थ्यमन्त्रीले शुभकामना कार्डसँगै पत्रकारहरुलाई पैसा बाँडे

काठमाडौं, आश्विन १५ – स्वास्थ तथा जनसंख्या मन्त्री राजेन्द्र महतोले पत्रकारहरुलाई दसैंको शुभकामना कार्डसँगै नगद वितरण गरेका छन् । उनले आफूनिकट, स्वास्थ्य बीट हेर्नेसहितका पत्रकारलाई ‘जरुरी काम छ, मन्त्रीज्यूलाई भेट्नु पर्‍यो’ भन्दै सहयोगीलाई पटकपटक टेलिफोन गर्न लगाइ पुल्चोकस्थित सरकारी निवासमा बोलाएर शुभकामना कार्डसहित ३ हजारदेखि ८ हजार रुपैयाँसम्म नगद वितरण गरेका छन् ।

स्रोतका अनुसार आफूलाई सहयोग गरेको भन्दै मन्त्री महतोले केही पत्रकारको सूचि आफैं तयार गर्छन् । उनले आफ्ना पार्टीका केही शीर्ष नेताहरुमार्फत टिपाएका पत्रकारकोसमेत सूचि तयार गरेर सहयोगीमार्फत हरेक वर्ष (मन्त्री हुँदा पनि नहुँदा पनि) पत्रकारलाई बाँड्दै आएका छन् ।

स्वास्थ्यमन्त्रीले शुभकामना कार्डसँगै नगद बाँडेकोमा नेपाल पत्रकार महासंघले आपत्ति जनाएको छ । कार्यवाहक महासचिव जगत नेपालले आइतबार विज्ञप्ती जारी गर्दै भनेका छन्, ‘स्वास्थ्य मन्त्री महतोको यो कार्य पदीय मर्यादाविपरीतमात्र होइन, नेपालको अन्तरिम संविधान र कानुनको प्रत्यक्ष उल्लंघन पनि हो ।’

महासंघले स्वास्थ्यमन्त्रीको कार्य अख्तियारको दुरुपयोग र भ्रष्टाचार नियन्त्रण ऐनविपरीतको काम भएको, सत्ता र शक्तिको आडमा सरकारी रकमको दुरुपयोग गरी पत्रकार र सञ्चारमाध्यमलाई भ्रष्ट र आफ्नो प्रशंसक बनाउन खोज्ने प्रयत्नको रुपमा लिएको जनाएको छ छ । ‘यसतर्फ आवश्यक अनुसन्धान गरी कारबाही प्रक्रिया अघि बढाउन महासंघ अख्तियार दुरुपयोग अनुसन्धान आयोगको ध्यानाकर्षण गराउँछ,’ विज्ञप्तीमा भनिएको छ ।

महासंघले पत्रकार आचारसंहिताविपरीतका यस्ता कार्यबाट टाढा रहन आफ्ना सबै सदस्यको पनि ध्यानाकर्षण गराएको छ ।

दसैंमा विशेष व्यवस्था

यसैबीच पत्रकार महासंघले दसैं विदाको अवधिमा सञ्चारमाध्यम र पत्रकारमाथि हुनसक्ने आक्रमण, प्रेस तथा अभिव्यक्ति स्वतन्त्रताविरोधी गतिविधि र काम-कारवाहीको सम्भावनालाई ध्यानमा राखेर विशेष व्यवस्था गरेको जनाएको छ ।

यस अवधिमा हमला वा हस्तक्षेप भएमा केन्द्रीय सचिवालय संयोजक सतीशजंग शाही (९८५१०७५३५५) र कार्यालय सहायक ख्यामप्रसाद चापागाईं (९८४१५९४८२४) लाई विवरण उपलब्ध गराउन महासंघले अनुरोध गरेको छ ।

Posred by: Shiva Paudel

Source: ekantipur