विश्वकपले ततायो नेपाली बजार


-राधिका ढकाल

पछिल्लो सातादेखि विश्वकै सञ्चारमाध्यम फुटबलमय भएका छन् । दक्षिण अफ्रिकामा विश्वकप फुटबल प्रतियोगिताको तयारी अन्तिम चरणमा पुगेका बेला बहुराष्ट्रिय कम्पनीका स्थानीय प्रतिनिधिहरु व्यापारमा छलाङ मार्न तीव्र प्रतिस्पर्धामा उत्रिएका छन् । उनाइसौं फिफा विश्वकप फुटबल प्रतियोगिता कुरेर बसेका उपभोक्तालाई हरेक दृष्टिकोणले रमाइलो, स्मरणीय र आनन्ददायक बनाउन व्यवसायीहरु कम्मर कसेर लागेका छन् । नयाँ टेलिभिजन, मादक पेयपदार्थ र सुस्वादु खानाको छनोट दिलाउन यतिबेला संसारभरका बहुराष्ट्रिय कम्पनीले नयाँ उत्पादन र बिक्री योजना ल्याएका छन् । फुटबलप्रेमी उपभोक्ता दक्षिणअफ्रिका जान सहज नभएको अवस्थामा आफ्नै घरपरिसरमा यसलाई अझ नजिक र रमाइलो बनाउन व्यापारीहरु प्रतिस्पर्धामा छन् । विश्वकपलाई टेलिभिजनमा हरेक दिन २ अर्बभन्दा बढी दर्शकले हेर्ने अनुमान गरिएको छ । यो अवसरमा आफूलाई विश्वव्यापी बनाउन हरेक कम्पनीले प्रतिस्पर्धा गर्छन् ।
विशेषगरी नरम तथा कडा पेयपदार्थ एवं स्न्याक्स उत्पादक र टेलिभिजन कम्पनीलाई विश्वकप फुटबलको रन्कोले रन्थनाएको छ । हरेक बहुराष्ट्रिय कम्पनीले यो अवधिमा व्यापार गर्ने लक्ष्य निर्धारण गरेका छन् । त्यसलाई पूरा गर्न संसारभरका विक्रेताले रातदिन एक गरेर काम गरेका छन्, जसको झलक नेपालको सञ्चारमाध्यम र स्थानीय बजारमा पनि देख्न सकिन्छ । कतिपय बहुमूल्य वस्तुको भाउ घटेको छ अथवा एउटा सामान किन्दा अर्को उपहार पाइन्छ । अझ भाग्यशाली विजेताका लागि त ठूला–ठूला उपहार नै राखिएको छ ।
यसपटक फिफाले आफ्नो साझेदारको रुपमा एडिडास, कोकोकाला, इमिरेट्स, हुन्डाई, सोनीलाई छनोट गरेको छ भने वद्भाइजर, म्याकडोनाल्ड र एमएनटीले प्रायोजक गर्ने अवसर पाएका छन् । विश्वकप सञ्चालनका लागि आवश्यक ठूलो रकम जुटाउन सहभागी यी कम्पनीले व्यापारिक लक्ष्य पूरा गर्ने हेतुले संसारभरका साझेदारहरूलाई स्थानीय बजारमा आक्रामकरुपमा उत्रन आह्वान गरेका छन् ।
बहुराष्ट्रिय कम्पनीहरूले यो अवसरलाई आफ्नो व्यापारिक साख विस्तारको महत्वपूर्ण समयको रुपमा लिन्छन् । माउ कम्पनीले नै बृहत कार्यक्रम ल्याएपछि संसारभर छरिएका स्थानीय विक्रेतासँगै नेपालका आधिकारिक विक्रेताले पनि बजार तताउन थालेका छन् ।
नेपालमा पनि विश्वकप फुटबलको क्रेज र आकर्षणसँगै बजार पनि त्यही अनुपातमा बढ्ने गरेको छ । समयको फाइदा उठाउन यतिबेला बजारमा विभिन्न टेलिभिजन कम्पनीले तीव्र प्रतिस्पर्धा गरिरहेका छन् ।
‘फुटबलको बहार, उपहारै उपहार’ शीर्षकको विज्ञापन राखेर टिभी बेच्ने प्रतिस्पर्धा सुरु भएको छ । बहुराष्ट्रियदेखि स्वदेशी टेलिभिजनका ब्रान्डले पनि विभिन्न आकर्षक प्रस्ताव ल्याएर बजार तताएका छन् ।
विश्लकपको साझेदार सोनी कर्पोरेसनले यो पर्वलाई लक्षित गरी नयाँ टेलिभिजन नै बजारमा उतारेको छ । थ्रीडी अनुभूति गर्न सकिने टेलिभिजन बजारमा ल्याएको सोनीको नेपालस्थित आधिकारिक विक्रेत्ता नेपा हिम ट्रेड लिंकले शुक्रबारदेखि लागू हुनेगरी उपहार योजनासमेत ल्याएको छ । यसअन्तर्गत सोनी ब्राभियाका विभिन्न एलसीडी टेलिभिजन खरिदमा पाउने कुपन स्क्राच गरेर तत्कालै उपहार पाउन सकिनेछ ।
“नेपालमा पनि फुटबल लोकप्रिय भएको र ब्राभिया टेलिभिजन प्रयोग गर्न चाहनेको संख्या बढ्दै गएकाले दुवैलाई एकै बिन्दुमा ल्याउन यो योजना ल्याइएको हो”, कम्पनीका मुरारी गौतमले भने ।
कम्पनीले ब्राभिया किन्नेलाई वायरलेस होमथियटर, डेक, साइबरसट क्यामेरा, वाकमेनलगायतका उपहार दिने कार्यक्रम ल्याएको छ ।
यतिबेला बजारमा सबैभन्दा बढी टेलिभिजन कम्पनीले विभिन्न अफर ल्याएर बिक्रीलाई तीव्र बनाउन थालेका छन् । एलजी, सीजी, भिडियोकोन, सामसुङलगायतका कम्पनीमात्र होइनन्, हिम इलेक्ट्रोनिक्स पनि प्रतिस्पर्धी बनेर उत्रिएको छ ।
विश्वकपका लागि सामसुङले ‘मेड फर फुटबल’ योजना भनेर नयाँ टेलिभिजन बजारमा ल्याएको छ । सामसुङको नेपालस्थित आधिकारिक विक्रेता हिम इलेक्ट्रोनिक्सले विश्वकपलाई लक्षित गरी ‘फुटबलप्रेमीलाई नयाँ उपहार’ भन्दै नयाँ टिभी बजारमा ल्याएको छ । यो योजनाअन्तर्गत दैनिक १ भाग्यशाली विजेताले ३२ इन्चको सामसुङ एलसीडी टेलिभिजन पाउनेछन् ।
भिडियोकोन टेलिभिजनले ‘फुटबलको बहार, भिडियोकोनको टिसर्ट उपहार’ योजना ल्याएको छ । “नेपालमा फुटबलको क्रेज बढेकाले अरु समयभन्दा विश्वकपमा व्यापार उच्च हुनेमा आशावादी छौं”, भिडियोकोनका तेजेन्द्र महराले भने । उनका अनुसार यो योजना आइतबारदेखि सुरु भइसकेको छ ।
चौधरी गुप्रले स्वदेशमै उत्पादन गरेको सीजी टेलिभिजनलाई यही माहोलमा घर–घर भित्र्याउने योजना बनाएको छ । सीजी टेलिभिजन किन्नेलाई सीजी टिममा पार्ने र ती ग्राहकले एलजी टेलिभिजनको खरिदमा लेदरबेल्ट, एलजी नाडीघडी, सीजी टिसर्ट पाउने कम्पनीका सञ्जय राजभण्डारीले जानकारी दिए । उनका अनुसार हरेक साता १ जना भाग्यशाली विजेता छनोट गरी ११ जनालाई बम्पर उपहारस्वरुप १ सय ९० लिटरको सीजी रेफ्रिजेरेटर दिइनेछ ।
चौधरी गुप्र मुख्य आधिकारिक विक्रेता रहेको एलजी टेलिभिजनमा पनि विश्वकपको बम्पर उपहार छ । एलजीको यो वर्षको नारा ‘एलजीको साथमा वल्र्डकप हातमा’ छ । यसअन्तर्गत एलजी टेलिभिजको खरिदमा हात खाली नजाने पक्का उपहारहरू राखिएको राजभण्डारीले बताए । उनका अनुसार यो योजनाअन्तर्गत १४ र १५ इन्चको एलजी टेलिभिजन खरिदमा नाडी घडी, २१, २२ र २९ इन्चमा एलजी टिसर्ट वा फुटबल र २६ भन्दा माथिमा एलजी डीभीडी प्लेयर राखिएको छ । विभिन्न लक्की ड्रमा एलसीडी टिभीदेखि ५ तोला सुनसम्मका उपहार पनि राखिएको उनले जानकारी दिए ।
टेलिभिजन कम्पनीमात्र होइन, विभिन्न उपभोग्य सामग्री उत्पादकहरूले समेत आफ्ना उत्पादन प्रवद्र्धन गर्न ग्राहकमुखी योजना ल्याएका छन् । विश्लकपलाई ध्यानमा राख्दै डाबर नेपालले रियल जुसको प्रायोजनमा ‘रियल गोल’ उपहार योजना ल्याएको छ । यो योजनाअन्तर्गत विज्ञापनमा दिइएका ११ बलमध्ये सही बल छानेर एसएमएस गर्ने ग्राहकले विभिन्न उपहार जित्नसक्ने कम्पनीका ब्रान्ड म्यानेजर अभय गोर्खालीले जानकारी दिए ।
उनका अनुसार रियल गोल गर्नेले कियाको कार, महिनाभरि सर्वाधिक सही एसएमएस गर्नेले एमपी–फोर प्लेयर र साप्ताहिक सर्वाधिक सही एसएमएस गर्नेले २२ इन्चको एलसीडी टीभीलगायत थुप्रै उपहार पाउनेछन् । यो कम्पनीले केही भाग्यशाली विजेतालाई उपहारको रुपमा सोनी टिभी दिइसकेको छ । १९ औं विश्वकप फुटबल विशेषमा व्यापार प्रवद्र्धनका लागि योजना ल्याउने डाबर नेपाल पहिलो भएको दावी गोर्खालीले गरे ।
वरुण वेभरेजले गर्मीमा पेप्सीको प्रवद्र्धनका लागि ‘फुटबल मेनिया’ कार्यक्रम ल्याएको छ । यसअन्तर्गत उपभोक्ताहरूले विश्वविख्यात फुटबल खेलाडी ड्रोग्बा, मेस्सी र हेनरीका चित्रअंकित ३ वटा बिर्कोका साथै एउटा ‘गोल’ लेखिएको बिर्को संकलन गरेर एसएमएसमार्फत गोलाप्रथामा आफ्नो नाम दर्ता गराउन सक्नेछन् । योजनाको अन्त्यमा विजेताले हिरो होन्डा करिज्मा जेडएमआर मोटरसाइकल जित्न सक्नेछन् ।
यस्तै पेप्सीका उपभोक्ताले हरेक साता ३२ इन्चको सामसुङ एलसीडी टिभी, नोकिया मोबाइल फोन, टाइमेक्स नाडी घडी, टिसर्ट, किरिङ र फुटबल खेलाडीका पोस्टर जित्नसक्ने कम्पनीका प्रमुख कार्यकारी सुरञ्जन डेले जानकारी दिए ।
विश्वकपकै अवसरमा युरोपको चर्चित कार कम्पनी हुन्डाईले पनि बम्पर उपहार योजना ल्याएको छ । मे १७ देखि जुन १० सम्म गोलाप्रथामार्फत ४ जना विजेता छनोट गरी दक्षिण अफ्रिकाको दुईतर्फी टिकटको व्यवस्था गरिएको कम्पनीका रुपेश भट्टले बताए ।
मिहो चाउचाउले पनि विश्वकपका लागि विशेष अफर ल्याएको छ । मिहो चाउचाउको उपहार कुपनबाट ११ जनाले दक्षिण अफ्रिकाको निःशुल्क टिकट पाउनसक्ने कम्पनीका हर्ष गर्गले जानकारी दिए । “हालसम्म ३ जना विजेता छनोट भइसकेका छन्”, उनले भने ।

One response to “विश्वकपले ततायो नेपाली बजार

  1. Biswa kap le south africa tataunu parne ko news writer ji ki kaso

जवाफ लेख्नुहोस्

Fill in your details below or click an icon to log in:

WordPress.com Logo

You are commenting using your WordPress.com account. Log Out /  बदल्नुहोस )

Google photo

You are commenting using your Google account. Log Out /  बदल्नुहोस )

Twitter picture

You are commenting using your Twitter account. Log Out /  बदल्नुहोस )

Facebook photo

You are commenting using your Facebook account. Log Out /  बदल्नुहोस )

This site uses Akismet to reduce spam. Learn how your comment data is processed.