नयाँ पत्रिका, काठमाडौं, १९ जेठ, राजधानीको कपनस्थित एक प्रहरी निरीक्षकको घरमा काम गर्न बसेका बालमजदुरले चरम यातना पाएका छन्　। उनलाई आइरन तताएर जताततै डामिएको तथा शरीरमा चक्कुले काटेर नुन-खुर्सानी हालिएको अवस्थामा उद्दार गरिएको छ　।

झापा गौरीगन्ज-७ का १४ वर्षीय घनश्याम महतोलाई प्रहरी निरीक्षक चेतबहादुर पाठककी श्रीमती सुशीला पाठकले यस्तो यातना दिएकी हुन्　। बुधबार साँझ स्वास्थ्यउपचारका लागि कान्ति बालअस्पताल पुर्‍याइएका बालकको पूरै शरीरभरि पोलेर छाला खुइलिएको, ओठ काटिएको र अनुहार पूरै सुन्निएको छ　। पैसा चोरेको निहुँमा आफूलाई यस्तो यातना दिइएको पीडित बालकले बताएका छन्　।

महानगरीय प्रहरी आयुक्तको कार्यालय रानीपोखरीमा कार्यरत प्रहरी निरीक्षक पाठकले महतोलाई गएको दसैँमा घरमा काम गर्न ल्याएका थिए　। पाठकको सालोको अफिसमा काम गर्ने एक महिलाको अनुरोधमा काठमाडौं आएको महतोले बताए　। पैसा दिने सर्तमा काठमाडौं आए पनि हालसम्म कुनै पारिश्रमिक नपाएको उनको भनाइ छ　।

‘आउँदा पैसा पनि दिउँला भनिएको थियो, तर अहिलेसम्म एक रुपैयाँ पनि पाएको छैन,’ उनले भने　। निरीक्षककी पत्नी पाठकले हराएको पैसा नपाएसम्म छाड्दिनँ भन्दै हातखुट्टा बाँधेर पिटेको पनि उनले बताए　। ‘आलु ताछ्नेले खुट्टाको छाला नै ताछिदिए,’ उनले रुँदै भने　।

यातना सहन नसकी हराएको पैसा चुक्ता नहुन्जेल भाँडा माझ्छु, नपिट्नूस् भन्दै रोइकराई गर्दा पनि नसुनेको उनले बताए　। ‘देख्दै नदेखेको पैसा मैले कहाँबाट ल्याउनु ?’ उनले भने　। पीडित बालकका अनुसार श्रीमती पाठकले यातना दिँदै गर्दा उनकी छोरी पनि घरमै थिइन्　। ‘म रोएँ, चिच्याएँ, तर कोही आएन, कसैले पनि सुनेन,’ उनले भने　। दिदीले दिएको यातनाले नपुगेर उनका भाइले समेत मुखमा लात्ती हानेका थिए　।

बाबुआमा सानैमा बितेको र फुपूले आफूलाई भीख मागेर हुर्काएको बालकले सुनाए　। प्रहरी निरीक्षक पाठकको घरमा आउनुअघि उनी होटलमा भाँडा माझ्थे　। ‘घर, सम्पत्ति, बाबुआमा कोही पनि छैनन्, सानै छँदा बितेका हुन्,’ उनले भने　।

पाठककी श्रीमती सुशीलाले यसअघि पनि यातना दिने गरेको उनको भनाइ छ　। भात पकाउँदा गिलो भए पनि पिट्थिन्,’ उनले भने, ‘भाँडा माज्दा प्लेट झर्‍यो भने पनि झम्टिन्थिन्　।’ घरका सबै काम उनैलाई लगाउने गरिएको थियो　। ‘मालिकको कट्टु, पेन्टीदेखि मालिक्नीको म्याक्सी, पेटिकोटसम्म धुन्थेँ,’ उनले भने　।

मालिक्नीको पैसा कसरी हरायो ? भन्ने आफूलाई थाहा नभएको उनले बताए　। ‘पैसा तैँले चोरेको होस्, निकाल्’ भन्दै कुटेकी थिइन्　। बालकको शरीर पूरै डामेपछि श्रीमती पाठक बाहिरबाट ताल्चा लगाएर छतमा उक्लिन्　। पछि घाइते बालकलाई भाँडा माझ्न भनेर ताल्चा खोलिदिएकी थिइन्　।

भाँडा माझ्ने बहानामा बालक बाहिर निस्केर नजिकैको पत्रिका पसलेको सहयोगमा बालबालिकाको क्षेत्रमा कार्यरत संस्था सिविसको शरणमा पुगेका थिए　।

यसैबीच बालकलाई निरीक्षक पाठकले प्रहरीको सहयोग लिएर संस्थाको प्रतिनिधिबाट खोस्न खोजेका थिए　। तर, स्थानीयवासीले प्रहरीको प्रतिकार गरे　। बालकलाई उपचारको साटो घटना ढाकछोप गर्न खोजेपछि स्थानीयवासीले प्रतिकार गरेका हुन्　। सो क्रममा भएको झडपमा परी केही स्थानीयवासीसमेत घाइते भएका छन्　। यसैबीच प्रहरीले बुधबार साँझ पीडक सुशीला, प्रहरी निरीक्षक पाठक र अर्का एकजनालाई नियन्त्रणमा लिएर अनुसन्धान थालिएको जनाएको छ　।