नेपाल छाड्ने तयारीमा पर्यटक

बुटवल, नेपाल भ्रमणका लागि भारतीय नाका हुँदै नेपाल आएका पर्यटक भ्रमण छोट्याएर र्फकन थालेका छन् । एकीकृत माओवादीको आमहडतालका कारण पर्यटकहरू नेपाल छाड्ने तयारीमा लागेका हुन् ।

मंगलबार मात्रै पोखराबाट एक दर्जनभन्दा बढी सवारीसाधनमा बुटवल हुँदै सुनौली नाकाबाट पर्यटक भारत गएका थिए । १५ दिने नेपाल भ्रमणमा आएका अमेरिकी जोडी कलिन रिड र अम्बेर रिड चीनको तिब्बत हुँदै नेपाल प्रवेश गरेका थिए　। तर, रिड दम्पती ६ दिनमा नै फर्किए । नेपाल भ्रमण गर्ने इच्छा भए पनि हडतालका कारण छोट्याएर भारत हुदै अमेरिकातर्फ जान थालेको उनीहरूले बताए　।

अहिले नेपाल रहेका पर्यटक धमाधम भ्रमण छोट्याउँदै फिर्ता जान थालेका छन् भने होटल बुकिङ रद्द गर्ने क्रम बढेको छ । साथै, स्थलमार्ग भएर आउने पर्यटक सीमा नाकाबाटै फिर्ता भइरहेका छन्　।

स्थलमार्ग हुँदै नेपाल प्रवेश गर्ने सबैभन्दा ठूलो बेलहिया नाकाबाट विदेशी पर्यटक धमाधम भारततर्फ जान थालेका छन्　।

माओवादी आमहडतालको तेस्रो दिन भिसाका लागि भारतबाट बेलहिया हुँदै आएका क्यालिफोर्नियाका एक जोडी पनि सीमानाकाबाटै फिर्ता गएका छन्　। उनीहरूले अन्नपूर्ण क्षेत्रको पदयात्रामा आएको र अवस्था त्यति राम्रो नभएको जानकारी पाएपछि भ्रमण छोट्याएको बताएका छन् ।

आमहडतालको पहिलो दिन बेलहिया नाकामा आइपुगेका ३१ जना  जापानी पर्यटक समूह पनि नेपाल प्रवेश नगरी भारततर्फ नै फिर्ता गएको बेलहियास्थित अध्यागमन कार्यालयले जनाएको छ ।

बेलहियास्थित अध्यागमन कार्यालयका अनुसार आमहडतालको पहिलो दिन करिब ४० पर्यटक सो नाकाबाट नेपाल भित्रिए पनि बन्दको दोस्रो दिन थाइल्यान्ड, रुस, चीन, इजरायलसहित जम्मा ६ मुलुकका पर्यटक सो नाका हुँदै नेपाल प्रवेश गरेका थिए　।

नेपालको पछिल्लो  अवस्थाबारे अनभिज्ञ विदेशी पर्यटक धमाधम सीमानाकाबाट भारततर्फ जाने क्रम बढेको मात्र होइन, नेपालबाट फिर्ता जाने पर्यटकले नेपाल भित्रँदै गरेका पर्यटकलाई असहज परिस्थितिबारे अवगत गराएपछि सीमाबाटै फर्केका छन्　।

बन्दका कारण पर्यटक आगमनमा कमी हुँदा प्रवेशाज्ञाबापत आउने शुल्कसमेत घटेको छ　। स्थलमार्ग हुँदै सबैभन्दा बढी विदेशी नेपाल प्रवेश गर्ने भैरहवाको बेलहिया नाका यतिखेर सुनसान देखिन थालेको छ ।