जय आले, कुवेत
१० मार्च २०१० को नेपाली दूतावास कुवेतद्वारा जारी बिज्ञप्ती अनुसार, कुवेतका लागि प्रथम नेपाली राजदूत महामहिम मधुवन प्रसाद पौडेलले कुवेती राजकुमार शैख नवाफ अल-अहमद अल-जाबर अल-सबाहसँग कुवेतको बयान प्यालेसमा शिष्टाचार भेटवार्ता गर्नु भएको छ । उक्त अवसरमा राजकुमार शैख नवाफले नेपालको राजनैतीक एवं आर्थिक स्थितिको बारेमा जानकारी लिंदै, दुई देशबीच द्विपक्षी सम्बन्ध बलियो पार्न अन्य उच्च स्तरिय भेटवार्ता र छलफल बारम्बार हुन जरुरी भएको कुरा दृढ पार्नु भयो । साथै राजकुमार शैख नवाफले नेपालको उन्नती र विकाशको लागि संभावित सहयोग पुर्याउन कुवेत सरकार सधैं तत्पर रहेको कुरा समेत व्यक्त गर्नु भएको छ ।
सो अवरमा राजदूत पौडेलले कुवेतमा नेपाली दूतावास स्थापना गर्नका लागि कुवेत सरकारले गरेको सहयोगको लागी नेपाल सरकारको तर्फबाट हार्दिक आभार व्यक्त गर्दै, नेपाल र कुवेतबीच द्विपक्षी सम्बन्ध सुधारको लागि नेपाल सरकारको उच्च प्राथमिकता रहेको जानकारी गराउँदै, हाल कुवेतमा कार्यरत अधिकांश नेपालीहरु घरेलु र अर्धदक्ष कामदारको रुपमा रहेकोले उच्च व्यवसायिक र दक्ष जनशक्तिलाई समेत कुवेतमा नियुक्ती गर्न सक्ने कुरा व्यक्त गर्नु भयो ।
यसैगरी राजदूत पौडेलले नेपाल, कुवेती पर्यटकहरुको लागि एक अत्युत्तम र मनोहर पर्यटकिय गन्तव्य हुन सक्ने र जसले दुई देशको द्विपक्षी सम्बध एवं वाणिज्य व्यापार व्यवसायमा समेत सुधार ल्याउन सक्ने कुरा पनि राजकुमार शैख नवाफसँग व्यक्त गर्नु भएको जारी बिज्ञप्तीमा जनाईएको छ ।
स्मरण रहोस्, राजदूत पौडेलले ०४ मार्च २०१० का दिन, कुवेतका प्रधानमन्त्री शेख नासरसँगको भेटवार्तामा पनि यस्तै किसिमका हितमुलक सवालहरु प्रधानमन्त्री समक्ष राख्नु भएको थियो ।
