चार नेता गम्भीर भए समस्या समाधान

नेकपा एमालेका बरिष्ठ उपाध्यक्ष बामदेव गौतमले नेपालका चारनेता गम्भीर भएर लागे मुलुकका बर्तमान समस्या केही दिनमै समाधान हुने ठोकुवा गर्नुभएको छ । नेकपा एमाले र प्रेस चौतारी नेपाल कैलालीद्वारा शनिबार धनगढीमा आयोजित पत्रकार सम्मेलनमा नेता गौतमले एमाले अध्यक्ष झलनाथ खनाल, एकीकृत नेकपा माओवादीका अध्यक्ष प्रचण्ड, नेपाली काग्रेसका सभापति गिरिजाप्रसाद कोइराला र बर्तमान सरकारका प्रमुख माधवकुमार नेपाल गम्भीर हुनुपर्ने बताउनुभयो । उहाँले नेताहरु मुलुककमा समस्याबारे गम्भीर नभएर जिम्मेवारीबाट पञ्छिए छ महिनापछि मुलुक संविधानविहीन हुने र त्यसपछि जो संग शक्ति हुन्छ उसैले मुलुक कब्जा गर्ने आशंका व्यक्त गर्नुभयो ।
तीन ठुला दलबीच सहमति, सहकार्यको विकल्प नरहेको चर्चा गर्दे नेता गौतमले सहमति भए यही सरकारको नेतृत्वमा पनि राष्ट्रिय सरकार बन्नसक्ने बताउनुभयो । सहमति भए संविधान बन्ने र शान्ति प्रक्रिया निश्कर्षमा पुग्ने ग्यारेन्टी भए एमालेले जस्तोसुकै त्याग पनि गर्न तयार रहेको बताउनुभयो ।