राष्ट्र बैंकबाट चालू आर्थिक वर्षका लागि मौद्रिक नीति पारित

नेपाल राष्ट्र बैंकको बिहीबार बिहान बसेको सञ्चालक समितिको बैठकले चालू आर्थिक वर्षका लागि मौद्रिक नीति पारित गरेको छ । केन्द्रीय बैंकले शुक्रबार मध्यान्ह मौद्रिक नीति सार्वजनिक गर्ने राष्ट्र बैंकका एक अधिकारीले जानकारी दिए । मन्त्रिपरिषद्को बिहीबार साँझ बसिरहेको बैठकले सर्वोच्चबाट मुद्दा जितेर आएका विजननाथ भट्टराईलाई पुनर्वहाली गर्ने अन्तिम तयारी गरेपछि उनैले मौद्रिक नीति सार्वजनिक गर्ने केन्द्रिय बै‌कका अधिकारीहरु बताउँछन । गएको आर्थिक वर्षमा उच्चदरको मुद्रास्फीति कायम रहेपछि यो वर्ष मौद्रिक नीतिमा अनिवार्य नगद मौज्दाद (सीआरआर) मा केही दरमा कटौती गर्न लागिएको छ भने बैंक दरमा सामान्य समायोजन गरिएको राष्ट्र बैंक स्रोतले जानकारी दियो ।
नेपाल राष्ट्र बैंक ऐन २०५८ आएपछि विगत केही वर्षदेखि राष्ट्र बैंकले सरकारले बजेट प्रस्तुत गरेलगत्तै मौद्रिक नीति सार्वजनिक गर्ने गरेको छ । अर्थतन्त्रमा मुद्राको स्तर कति कायम राख्ने र त्यस्तो मुद्रा के प्रयोजनमा उपयोग गर्ने भन्ने नीतिनै मौद्रिक नीति हो । कुनै पनि देशको केन्द्रीय बैंकले यस्तो नीति सार्वजनिक गर्ने गर्छ । राष्ट्र बैंकले लिने लचिलो वा कडा मौद्रिक नीतिले बजारमा मूल्यस्थितिमा प्रभाव पार्छ । मूल्यवृद्धिलाई प्रमुख चुनौतीको रुपमा लिँदै केही कडा खाल रुझान भएको मौद्रिक नीति ल्याउन लागिएको स्रोतको भनाइ छ ।