आर्थिक मन्दीका कारण सयौँ नेपाली घर फर्किए

दुबई। आर्थिक मन्दीको प्रभावका कारण वैदेशिक रोजगारीका क्रममा खाडी मुलुक संयुक्त अरब इमिरेट्स (यूएई) मा कार्यरत सयौँ नेपालीले कामबाट अवकास पाएका छन् । अवकास पाउनेमा नेपालबाट आएर दुई महिनासम्म काम गरेकादेखि विगत डेढ वर्षदेखि कार्यरत नेपाली छन् । पछिल्लो पटक दुबई र सारजाहबाट सयौँ नेपालीले अवकास पाएका छन् । सोमबार काम गरी कोठामा पुगेका अधिकांश नेपाली मङ्गलबार कार्यालय पुग्दा गेटमा अवकास पाएको सूचना टाँस गरिएको थियो । एक्कासि कामबाट निकालिँदा पीडित नेपाली आक्रोशित भएका छन् । यद्यपि आक्रोशित नेपालीले जति रुने कराउने गरे पनि सुन्ने कोही नभएका कारण घर फर्किने गरेका छन् । आएको दुई महिनामा नै अवकास पाएपछि कपिलवस्तुको विशनपुराका बलिया थारू र शङ्कर चौधरीले दुबई आउँदाको ऋण तिर्न त परै जाओस् आउँदाको भाडासमेत उठाउन नसकेको बताए ।

त्यस्तै तनहु, नवलपरासी, पाल्पा, चितवन, रूपन्देहीलगायतका जिल्लाका झन्डै डेढ सय युवाहरू बाध्यताबश घर र्फकने तयारीमा रहेका छन् । उनीहरू दुबईको इलेक्ट्रोनिक्स कम्पनीमा उत्पादन र बिक्रीवितरणमा कार्यरत थिए । उता बुधबार नै सारजाको प्रतिष्ठित कम्पनी एलएनटी र बजाजको सीएफएल निर्माता कम्पनीले संयुक्त रूपमा ६५० कर्मचारी कटौती गरेको समाचार आएको छ । त्यहाँस्थित कम्पनीलाई उद्धृत गर्दै सहकर्मी विकास श्रेष्ठले दिएको जानकारीअनुसार भारतीय कामदार र बङ्गलादेशीसहित करिब दुई नेपालीले अवकास पाएका छन् ।

यूएई सरकारले एक महिनाअघि सार्वजनिक रूपमा प्रत्येक कम्पनीले कर्मचारी हटाउन, नयाँ कर्मचारीको आवश्यकता सिर्जना नगर्न तथा क्षणिक अवधिका लागि बजारमा अत्यावश्यक बाहेकका सामग्री उत्पादनमा रोक लगाएको थियो । जसका कारण यहाँका प्रायःजसो कम्पनीले ४५ प्रतिशतका हिसाबले कर्मचारी कटौती गरेका छन् । नेपाली दूतावासले यूएई सरकारले विश्व आर्थिक मन्दीका कारण नेपाली कामदार कटौती गरिरहेको बताएको छ । दूतावासका कर्मचारीले कुन कम्पनीले कति र कुन हिसाबले कटौती गरेको भन्ने जानकारी नभएको जनाएको छ । 

जय आले (कुवेत)