काठमाडौं, फागुन १३ – एमालेको आठौँ महाधिवेशनबाट झलनाथ खनाल अध्यक्ष निर्वाचित भएका छन् । प्रतिद्वन्द्वी केपी शर्मा ओलीलाई पराजित गरी खनाल पार्टीको मुख्य कार्यकारी पदमा चुनिएका हुन् । खनालले ९ सय १३ मत पाए भने ओलीले ७ सय ९६ ल्याए । उपाध्यक्षहरूमा अशोक राई, वामदेव गौतम र विद्या भण्डारी निर्वाचित भएका छन् । राई र भण्डारी ओली प्यानलका हुन् भने गौतम खनालनिकट हुन् । महासचिवमा खनालनिकट ईश्वर पोखरेलले ओली समर्थित प्रदीप नेपाललाई फराकिलो अन्तरले पराजित गरेका छन् । सचिवहरूमा ओली पक्षका विष्णु पौडेल, शंकर पोखरेल र खनाल पक्षका युवराज ज्ञवाली निर्वाचित भएका छन् । उपाध्यक्षका उम्मेदवार भरतमोहन अधिकारी, साहना प्रधान र भीम रावल पराजित भए । सचिव पदका उम्मेदवार रामचन्द्र झा, राजेन्द्र श्रेष्ठ र रघुवीर महासेठ पराजित भए । केन्द्रीय पदाधिकारीमा खनाल र ओली प्यानलको मिश्रति परिणाम आएको छ । अध्यक्ष, महासचिव र अन्य पदाधिकारीमा सहमति जुटाउन प्रमुख नेताहरूले गरेको प्रयास असफल भएपछि प्रत्यक्ष निर्वाचनबाट नेतृत्व चयन भएको हो । यसअघि केन्द्रीय कमिटीबाट पार्टी प्रमुख चयन हुने गरेको थियो । ‘पार्टीको आन्तरिक लोकतन्त्र सुदृढ गर्न’ महाधिवेशनले अध्यक्ष, महासचिव, तीन/तीन उपाध्यक्ष र सचिव रहेको बहुपदीय संरचना बनाएको छ ।
दुवै प्यालनको समर्थन पाएका भरतमोहन अधिकारी पराजित भए । महासचिवमा खनाल प्यालनका ईश्वर पोखरेल विजयी भए । उनले ओली समर्थित प्रदीप नेपाललाई फराकिलो अन्तरले पछि पारेका हुन् । कार्यकारी अध्यक्षको व्यवस्थाले महासचिव पहिलेजस्तो शक्तिशाली नभए पनि पार्टीको आन्तरिक राजनीतिमा पोखरेल हावी भएका छन् । सचिवमा ओली समर्थित विष्णु पौडेलले सर्वाधिक र शंकर पोखरेलले दोस्रो मत पाएका छन् । तेस्रो मत पाएर खनाल पक्षका युवराज ज्ञवाली निर्वाचित भएका छन् । महाधिवेशनको अन्तिम समयसम्म पनि सहमतिको पक्षमा उभिएका कार्यकर्ताले केन्द्रीय कमिटीमा दुवै पक्षको सन्तुलित उपस्थिति गराएका छन् । पूर्वमा ओली र उपत्यकामा खनाल प्यानल बलियो देखिएको छ । मेची नरेश खरेल -७७०), कोसी राजेन्द्र गौतम -७८३), सगरमाथामा जगन्नाथ खतिवडा -९०५), जनकपुरमा केशवप्रसाद देवकोटा -६५८), नारायणीमा देवीप्रसाद ज्ञवाली -७८२) र वाग्मती पशुपति चौलागाईं -८६८) निर्वाचित भएका छन् । त्यसैगरी उपत्यकाबाट योगेश भट्टराई, धौलागिरिबाट गणेश तिमल्सिना, गण्डकीबाट खगराज अधिकारी, राप्तीबाट प्रकाश ज्वाला, भेरीबाट देवराज भार, कणर्ालीबाट डिल्लीबहादुर महत, सेतीबाट भानुभक्त जोशी र भारत प्रवासबाट झिल्लुप्रसाद तिवारी निर्वाचित भएका छन् । यसअघि महाकालीबाट उर्वादत्त पन्त र लुम्बिनीबाट नेत्र पन्थी निर्विरोध भएका थिए । आदिवासी जनजातिबाट ६ वैकल्पिकमा अजम्बर काम्बाङ, कमलप्रसाद सुनुवार, गोकुल घर्तीमगर, जीवनराम श्रेष्ठ, वैद्यनाथ चौधरी थारू र विषमलाल अधिकारी दनुवार निर्वाचित भएका छन् । खुला क्षेत्रको वैकल्पिक सदस्यमा ठाकुर गैरे निर्वाचित भएका छन् । बाँकी मतगणना मंगलबार राति जारी छ । बुधबारसम्ममा सबै परिणाम आउने निर्वाचन कमिटीका प्रमुख हरिकृष्ण कार्कीले बताए ।
नीतिगत परिवर्तन भएन,
महाधिवेशनले सैद्धान्तिक र नीतिगत रूपमा ठोस परिवर्तन गरेन । सांगठनिक संरचनामा भने व्यापक परिवर्तन भएको छ । आन्तरिक लोकतन्त्र सुदृढ गर्न एमालेले प्रत्यक्ष निर्वाचन र बहुपदीय संरचनाको व्यवस्था गरेको छ । महाधिवेशन बन्दसत्रले खनालको राजनीतिक प्रतिवेदन र अमृत बोहराको विधान संशोधन प्रस्ताव परिमार्जनसहित पारित गरेको थियो । महाधिवेशन प्रतिनिधिले पार्टीको मुख्य सिद्धान्त जनताको बहुदलीय जनवाद -जबज) को रक्षा, माओवादीसँग वैचारिक संघर्ष, सरकारको प्रभावकारितामा जोड दिएका थिए । जुनसुकै सरकारमा सहभागी हुने प्रवृत्तिदेखि उद्घाटनमा प्रधानमन्त्री एवं माओवादी अध्यक्ष पुष्पकमल दाहाललाई दिइएको विशेष महत्त्वप्रति कार्यकर्ताले असन्तुष्टि जनाएका थिए ।
प्रतिस्पर्धी र मत
अध्यक्ष
झलनाथ खनाल ९१३, केपी ओली ७९६
उपाध्यक्ष
अशोक राई ११९९, वामदेव गौतम ८६५, विद्या भण्डारी ८५१, भीम रावल ७२२, साहना प्रधान ६१८, भरतमोहन अधिकारी ६००
महासचिव
ईश्वर पोखरेल ९३५, प्रदीप नेपाल ७३२
सचिव
विष्णु पौडेल १२६२, शंकर पोखरेल १०५८, युवराज ज्ञवाली ८३५, रघुवीर महासेठ ६५७, राजेन्द्र श्रेष्ठ ६७२, रामचन्द्र झा ४८७
कातिपुर दैनिक
